मेनुका शर्मा (जिज्ञासु)/स्वर्गद्धारी न.पा.-८,प्यूठान-
छोरा मेरो टाउको काटिदैछ,
तिमी रहन्छौ कसरी..!
छोरी मेरा खुट्टा भाचिदैछन्
तिमी सहन्छौ कसरी ..!!
मलाई कसैले तान्दैछ तलबाट
त्यसलाई तिमीले छेक्नुपर्छ,
मलाई कसैले थिच्दैछ माथिबाट
त्यसलाई तिमीले रोक्नुपर्छ ,
होइन भने मेरो टाउको अर्कैको अधिनमा रहनेछ ,
मेरो सेतै फुलेको कपालमा कसैले जुम्रा छोडिदिनेछ,
तिमी मेरो सन्तान हौँ भने मेरो रक्षा गर,,
तिम्रा दाजुले मलाई तिम्रै जिम्मामा छोडेर गए,
मेरै सुरक्षा गर्दा आफ्नो जीवन बलिदान दिए,
उठ तिमी नत्र दुस्मनले मेरो रगत पिउनेछ,
तिमीले टेक्ने मेरो छाती नरहे तिमी रहन्छौ कसरी…!!
मेरै पसिनाले तिम्रो प्यास मेटिएको छ,
मेरै स्वासले तिमीलाई शितलता दिएको छ,
मेरै ढाडमा बुई चढ्दा तिमीलाई आनन्द भएको छ,
मेरै काधमा टेकेर झण्डा फर्फराउदा तिम्रो शिर उच्च रहेको छ,,
मेरै शिर नरहे तिमी रहन्छौ कसरी..!!
आऊ अब जोगाउ आफ्नी आमालाई पराईले आफ्नो बनाउदैछ,
तिमीले आफ्नै दाजुको बाटो रोज्नुछ,
आफ्नी आमाको अधिकार खोज्नुछ,
आमाकै शिर ढल्दा तिमी सहन्छौ कसरी ..!!
मेरो टाउको काटिदैछ तिमी रहन्छौ कसरी ..!
मेरा खुट्टा भाचिदैछ तिमी सहन्छौ कसरी…!!
