मानवता

मुकुन्द कृष्ण थापा 
– खोटाङ

रंगिन चस्मा लगाएर 
असत्यको पदचाप पछ्याउँदै 
मानव सभ्यताको पाठ पढ्न बिर्सिएर
हिंस्रक मानसिकता बोकेका राक्षसी प्रवृतिहरुमा
नैतिकता र ईमान्दारिताको खडेरी परेकाहरुमा
खै कहिले पलाउलान् ?
सकारात्मक सोचका पालुवाहरु !
अरुको रोदनमा अट्टाहस हाँसो हाँसेर 
दरिद्र सोचाइहरुमा रमाएर 
छुद्र बोली बोल्दै
भतभती पोलीरहेका घाउहरुमा नुनचुक छर्दै
बचनका तिखा तिखा बाण हान्ने ति जिब्रोहरुबाट 
खै कहिले निस्किएलान् ?
महझैँ गुलिया शब्दहरु !!


अन्यायको अँध्यारो सुरुङबाट 
उद्दारको प्रतीक्षामा थरथरी काप्दै 
सहारा मागीरहेका हातहरुलाई
गरिबीले थकित भएकाहरूको आर्तनादलाई 
सुमधुर संगीत सम्झिदै आनन्द मान्नेहरुले
खै कहिले हटाउलान् ?
वर्गीयताको तुलोमा जोखिने बिभेदहरु !
मेहनत रोपी पौरख फलाउनेहरुमाथि 
रजाइँ गरेर
हीनताबोधको हिलो छ्याप्दै 
ठालु पल्टिनेहरुले
आत्मीयतालाई कुल्चिदै अस्वस्थ प्रतिस्पर्धामा
धनको गुलियो वरिपरि 
फनफनी घुमिरहेकाहरुले
खै कहिले चढ्लान् ?
विवेकका अग्ला अग्ला शिखरहरू !!

(मुकुन्द कृष्ण थापा सिभिल इन्जिनियर हुन् । उनी साहित्य क्षेत्रमा समेत कलम चलाउँछन् )

.

Leave a Reply

Your email address will not be published. Required fields are marked *

Back to top button
Close
Close